ភ្នំពេញ ៖ គិតត្រឹមរសៀលនៅថ្ងៃទី២៥ កក្កដា ២០១៧នេះ កម្លាំងនគរបាលក្រសួងមហាផ្ទៃ បានសម្រេចធ្វើការឃុំខ្លួនជាបណ្តោះអាសន្ន បន្ទាប់ពីការសួរនាំ ក្នុងរយៈពេលប៉ុន្មានថ្ងៃនេះបានរកឃើញថា ជនបរទេសជានាយករងនៅសាលាអន្តរជាតិ GOLDEN BRIDGE ពិតជាបានជាប់ព័ន្ធនឹងបទល្មើសពិតប្រាកដមែន ។
បើតាមមន្ត្រីជាន់ខ្ពស់នៃតំណាងអយ្យការអមសាលាដំបូងរាជធានីភ្នំពេញ បានអោយដឹងថា សម្រាប់សំណុំរឿងនេះគឺមានការសួរនាំលម្អិតបន្ថែមទៀត ដោយលោកបញ្ជាក់ថា «បន្ទាប់ពីសួរនាំទៅ កម្លាំងនគរបាលជំនាញនៃនាយកដ្ឋាន ប្រឆាំងការជួញដូរមនុស្ស និងការពារអនីតិជន នៃក្រសួងមហាផ្ទៃ បានសម្រេចធ្វើការឃាត់ខ្លួន ដោយសាររកឃើញថា ជននេះពិតជាបានជាប់ព័ន្ធ នឹងបទល្មើសនេះមែន ហើយនឹងចាត់ការតាមនីតិវិធីបន្តទៀត ដោយកសាងសំណុំរឿងបញ្ជូនទៅតុលាការ» ។
ប្រភពពីហ្វេសប៊ុក Child Helpline Cambodia បានផ្សាយអោយដឹងថា បុរសជនជាតិអង់គ្លេសឈ្មោះ Mark Smith អាយុ៣៩ឆ្នាំ ជានាយករងសាលារៀនអន្តរជាតិ Golden Bridge ដែលត្រូវចាប់ខ្លួនកាលពីល្ងាចថ្ងៃសុក្រទី២១ ខែកក្កដា ឆ្នាំ២០១៧ ពីបទឧក្រិដ្ឋកម្មផ្លូវភេទលើកុមារកម្ពុជា អាយុ៥ឆ្នាំ ដែលជាសិស្សនៅសាលានោះ Golden Bridge ផងដែរ ។
សូមរំលឹកឡើងវិញថា កម្លាំងនគរបាលក្រសួងមហាផ្ទៃ នៅពីល្ងាចថ្ងៃទី២១ កក្កដា ២០១៧ នេះបានចុះទៅឃាត់ខ្លួនបុរសជនជាតិបរទេសម្នាក់ ជាជនជាតិអង់គ្លេស ដែលបង្រៀននៅសាលាអន្ដរជាតិ GOLDEN BRIDGE International School ស្ថិតនៅខណ្ឌទួលគោក បន្ទាប់ពីបែកធ្លាយរឿងអាស្រូវ ជនបរទេសរូបនេះ បាននាំក្មេងស្រីជាសិស្សសាលា អាយុទើប៥ឆ្នាំ ទៅរួមភេទដល់ផ្ទះ ។
មន្ដ្រីនគរបាលជាន់ខ្ពស់ក្រសួងមហាផ្ទៃ បានអោយដឹងថា ជនបរទេសដែលជាគ្រូបង្រៀន ត្រូវបានកម្លាំងសមត្ថកិច្ចឃាត់ខ្លួន មានឈ្មោះ Mark Andrew Smith ជនសង្ស័យជានាយករងសាលាថ្លៃកប់ពពក ត្រូវបានចាប់ខ្លូនខណៈពេលចេញពីសាលារៀន ។
ការចុះទៅឃាត់ខ្លួនបុរសជនជាតិបរទេសរូបនេះ បន្ទាប់ពីធ្លាយព័ត៌មាន និងបានបង្ហោះចែកចាយនៅលើបណ្ដាញសង្គម Facebook របស់ស្ដ្រីវ័យចំណាស់ម្នាក់មានគណនីឈ្មោះ «Vriya MC» ដែលបានរៀបរាប់ពីហេតុការណ៍មួយនេះ បន្ទាប់ពីឪពុកម្ដាយក្មេងស្រីរងគ្រោះបានប្រាប់ទៅស្ដ្រីរូបនេះ ប៉ុន្ដែពួកគេមិនហ៊ានដាក់ពាក្យបណ្ដឹងទៅសមត្ថកិច្ច គ្រាន់តែបានទៅជួបជាមួយនាយកសាលាដែលជាជនជាតិខ្មែរ ។
បើយោងតាមស្ដ្រីម្ចាស់គណនី Facebook រូបនេះ មិនបានបញ្ចេញឈ្មោះសាលានោះឡើយ គ្រាន់តែអះអាងថា ជាសាលាអន្ដរជាតិដ៏ធំមួយនៅភ្នំពេញ ។ ស្ដ្រីរូបនេះ បានស្ដាប់ចម្លើយក្មេងស្រីរងគ្រោះថា គ្រូជនជាតិបរទេសបាននាំនាងទៅផ្ទះរបស់គាត់ រួចបានប្រើអណ្ដាតលិត លើប្រដាប់ភេទរបស់នាង រហូតមានបញ្ហាទើបឪពុកម្ដាយឆ្ងល់ ក៏បានទូរស័ព្ទទៅដល់លោកស្រី ។
បើទោះបីឪពុកម្ដាយក្មេងស្រីរងគ្រោះ មិនបានដាក់ពាក្យបណ្ដឹងនោះ ប៉ុន្ដែកម្លាំងសមត្ថកិច្ចបានធ្វើការស្រាវជ្រាវហើយឈានទៅដល់ការចាប់ខ្លួន ខណៈដែលព័ត៌មាននេះ បានសាយភាយ និងកក្រើកពេញបណ្ដាញសង្គម ហ្វេសប៊ុក ហើយម្នាក់ៗចង់ដឹងឈ្មោះសាលាថា ជាសាលារៀនមួយណា ការពិតសាលាអន្ដរជាតិ GOLDEN BRIDGE International School ៕
